Congress President Mallikarjun Kharge-a'n CWC meeting ko

Congress party president, Malikarjun Kharge chuan Congress Working Committee (CWC) hruaitu siam remna a neih hnu lawkah September 16 hian Hyderabad-ah CWC meeting a koh nghal thu AICC general secretary KC Venugopal chuan a sawi.

CWC siam ṭhatah hian hruaitu langsar tak tak, G23 group an tih mai zinga mi, Shashi Tharoor leh Anand Sharma te pawh lak luh thar an ni.

All India Congress Committee headquarter-a press conference neihnaah, Venugopal chuan September 16 bakah, ni 17-ah pawh CWC meeting neih chhunzawm tur niin, Pradesh Congress Committee hruaitute zawng zawng an tel tawh tur thu a sawi. September 17 tlaiah vek hian Telangana inthlan tur atana an thil tumte sawi chhuahna atan Hyderabad chhehvelah kawng an zawh dawn niin a sawi bawk.

Kharge hian CWC hruaitu siam ṭhatna hi August 20 khan a tifel tawh a, hruaitu upa leh hlun zawkte dah tho siin, hruaitu naupang leh chher theih zawkte a lak luh belh a ni. President a nih hnu lawka din, CWC-ah hian member 39 awmin, a ngheta sawm bik 32 an awm a, telpui tura sawm mi 13 awm bawkin CWC member zawng zawng hi 84 an ni.