President-in Rajghat-ah Mahatma Gandhi lim hawng

Delhi-a Mahatma Gandhi thlan, Rajghat-ah Thawhṭanni khan president Droupadi Murmu chuan ft. 12-a sang, Gandhi lim an siam chu a hawng.

President hian Gandhi lim bakah Gandhi Vatika an tih, pose hrang hranga Gandhi ding lai an dahna huan chu a hawng nghal bawk a ni.

Droupadi Murmu chuan Mahatma Gandhi chu khawvel tana thilpek hlu ber a nih thu sawiin, a ngaihtuahna leh nunphungte chuan khawvel tan kawng thar a buatsaih thu a sawi a, Gandhi Vatika-a Gandhi limte hian helai hmun tlawhtute, a bikin naupangte hnenah nasa taka thu a sawi a beisei thu a sawi. "South Africa President Nelson Mandela bakah Martin Luther King Jr. aṭanga US President hlui Barack Obama thlengin Gandhi-a tharum tel lo nun kha khawvel hmasawnna tur a ni tih an pawm vek," tiin Gandhi lim hawnna hun hmannaah hian a sawi.

Gandhi lim hawnna hunah hian Delhi Lt. Governor VK Saxena bakah Vijay Goel vice-chairman Gandhi Darshan te chu an tel a ni.