President-in National Teachers' Award hlan

President Droupadi Murmu chuan nimin September 5, Teachers' Day puala Vigyan Bhawan-a hun hmanah zirtirtu 75 hnenah National Teachers' Award a hlan.

Ministry of Education hnuaia Department of School Education & Literacy te hian kum tinin ram pum huapa Teachers' Day lawmna hun hi an buatsaih ṭhin a, hetah hian ram chhunga zirtirtu ṭha zual an thlan chhuahte chu National Teachers' Award an hlan ṭhin a ni.

Kumina National Teachers' Award dawng tur thlannaah hian kum dang aiin a huang zauh deuh a ni a, Department of Higher Education leh Ministry of Skill Development and Entrepreneurship hnuaia zirtirtute pawh an thlang tel tawh a ni. Award dawng tur an thlan dan hi an uluk hle a, Ministry lam hian mi thiam ber berte awmna, Independent National Jury pathum dinin, anni rawtna aṭangin zirna hmasawnna atana thawh hlawk leh zirlaite tana entawn tlak zirtirtute thlan chhuah an ni ṭhin.

Kuminah hian sikul zirtirtu 50, higher education institution zirtirtu 13 leh Ministry of Skill Development and Entrepreneurship hnuaia zirtirtu 12 te hnenah Award hi hlan a ni. National Teachers' Award hian pawisa fai Rs. 50,000/- bakah certificate leh silver medal te a keng tel a, award dawng zawng zawngte hian Prime Minister kawmna hun an nei bawk a ni tiin Ministry of Education thuchhuah chuan a tarlang.

Award semnaah hian Union Minister for Education and Skill Development and Entrepreneurship, Dharmendra Pradhan, Minister of State for Electronics and Information Technology and Skill Development and Entrepreneurship Rajeev Chandrasekhar leh midang eng emaw zat an tel bawk a ni.