INDIA committee-te ṭhu khawm dawn

Kum 2024 inthlanpui lo awm tur atana BJP sorkar khing leh paih thla tura eptu party hrang hrang ṭang khawm, I.N.D.I.A. chuan August 30 leh September 1 a Maharsahtra-a meeting an neih zawh takah khan coordination committee leh campaign committee an din a, heng committee an dinte hian meeting neih nghal an tum thu an puang.

September 13 hian coordination committee te chu an ṭhu khawm dawn a, Delhi-a Nationlist Congress Party (NCP) hruaitu, Sharad Pawar-a inah an inhmu khawm dawn tih an sawi. Campaign committee pawh Milap building-ah nimin tlai lam khan meeting an nei nghal bawk a ni.

INDIA hian campaign committee-ah hian mi 19 an ruat sa bakah mi pahnih; DMK mi Tiruchi Siva leh PDP aṭangin Mehboob Beg te an ruat belh leh.

Maharashtra-a INDIA meeting-ah hian resolution an siam a, ṭang ruala kum 2024 inthlanpui chuh ho leh seat insem pawh rilru zau tak pu chunga rel fel vat an intiam bawk a ni. Resolution-ah hian party zawng zawngte'n ram chhung hmun hrang hranga a hma lama rally buatsaih an tum thu an sawi bawk.