Telangana-ah ruah surin nunphung a la tibuai nasa

Telangana-ah ruah sur nasain ziaawm lam a la pan thei lo a, nimin zinga Hyderabad leh a chhehvela ruah surin tuilian a siam leh kawngpui a hnawh nasat avangin sorkar chuan Hyderabad, Medchal leh Rangareddy-ah te sikul chawlh a puang.

Nimin zing karah ringawt pawh Miyapur khua chuan ruah tui 14.7 cm a dawng a, Kukaypally-a HMT Nagar chuan ruah tui 14 cm a dawng ve bawk niin Telangana State Development Planning Society chuan an tarlang. Heng bakah hian Serilingampally chuan (13.8 cm), Rajendranaga (13.8 cm), Quthbullapur (12.1cm), Shaikpet (12 cm), Khairatabad leh Malkajgiri (10.9 cm), Secunderabad (10.7 cm) te chuan darkar rei lote chhungin ruah tui cm 10 aia tam an dawng hman bawk a ni.

Indian Meteorological department chuan Hyderabad tan hian 'Orange' alert a tichhuak a, Greater Hyderabad Municipal Corporation pawhin mipuite chu an himna atan hun eng emaw chen chu mahni ina tawm a, pawn chhuak lo hram turin ngenna a tichhuak a ni. Kawngpuia tui tling avangin hmun tam takah lirthei tang a awm a, bus tang pawh Disaster Response Force-te'n pahnih an la chhuak. Hyderabad Traffic Police te chuan mipuite chu ruah sur hnuaia lirthei khalh fimkhur turin an chah bawk.