Document lem nuai 2 chuang siam avangin mi 2 man

Gujarat-ah a ruka sorkar database-a lut a, Aadhar card, Pan card leh voter ID nuai hnih chuang la chhuaka hralhtu mi pahnih man an ni tih Assistant Commisioner of Police (Economic Offences), VK Parma chuan a sawi.

Police-te chuan private sector bank pakhat hnen aṭanga complaint an dawn angin, kar hmasa khan document lem hmanga loan la leh rul tawh anga inlantir kaihhnawihah mi paruk man an nih thu an sawi. Heng an mi mante an dawpna aṭang hian an zinga pakhat, Prince Hemant Prasad tia hriat chuan sorkar database-a document te download tur hian website kaltlanga a in register thu a sawi a ni. He website hian mi hrang hrang document eng emaw zat chu Rs. 15- 50 in an lo hralh a, Prasad hian he website kaltlanga an document lei hmang hian bank loan an dil thu leh sim card an lei thute a sawi a ni.

He thubuai chhuina kal zelah document zawrhna website-a phone number dah neitu nia hriat, Rajasthan mi, Somnath Pramodkumar chu an man tawh thu police-te chuan an sawi. Website siamtu hming nia lang, Uttar Pradesh mi, Previrsinh Thakur inti chu an man tawh bawk. Thakur hi sorkar database aṭang document la chhuak a, hralh lehna kawnga a hmuipuipu ber nia hriat a ni. Thu zawh fiah an nih aṭangin he thil hi kum thum zet an lo kalpui tawh a, kum hnih chhungin document nuai 2 chuang an siam tawh thu an sawi a ni.

VK Parmar chuan,"He thubuai hi ram pum himna tur ngaihtuah chuan thil pawi leh hlauhawm tak a ni. Sorkar database thlak loin an lutin an hmang thei tihna a ni a, chu chu dan kalh a ni. Anni pahnih chauh lo pawh hi mi tam tak he thila inrawlh hi an awm ngei kan ring," tiin a sawi.