SC-ah UGC laka petition thehluh ngaihtuah
Supreme Court chuan nimin khan Karnataka, Assam, Uttar Pradesh, Bihar, Mehalaya leh state danga zirlai 31-ten University Grants Commission (UGC) in examination buatsaih tura university-te hriattirna a pek chungchanga petition an thehlutte a ngaihtuah a, August 14-a ngaihtuah chhunzawm turin a dah.
UGC hian July 6 khan university-te hnenah September 30-ah final year examination buatsaih turin hriattirna a tichhuak a ni. Hetih lai hian zirlai tam tak chuan hripui leng vangin exam hi buatsaih lo tura an duh thu sawiin, petition thehlutte hian internal assesment leh a hma exam-a an performance azira an mark siam mai turin an phut thung.
Justice Ashok Bhushan, R Subhash Reddy leh MR Shah-te awmna Supreme Court bench chuan zirlaite petition thehluh hi an ngaihtuah a, hetihlai hian UGC aiawha ding Solicitor General Tushar Mehta chuan zirlaite chu exam tura an inbuatsaih zel a ngai a ni tiin, "Exam buatsaih a nih loh chuan zirlaite chuan degree an nei thei dawn lo," a ti.
Hearing neih hmasaah pawh UGC chuan a thutlukna hi tihdanglam a tum lo tih a lo sawi tawh. University 818 aṭangin report an dawng tawh a, an zinga 603 chu exam buatsaih mek leh exam tura inbuatsaih mek anni a, university 209 chuan online leh offline hmangin exam hi an buatsaih zo tawh.