Indonesia-ah Prime Minister Narendra Modi zin

Indonesia-a ASEAN-India summit leh East Asia summit hmang turin prime minister Narendra Modi chuan nimin khan India a chhuahsan.

ASEAN-India summit hi kum tina neih ṭhin a ni a, kuminah hian Indonesia hian East Asia summit nen a thleng kawp a ni. Summit-ah hian Indo-pacific-a thil hrang hrang dinhmun, insumdawn tawnna , Myanmar ram buai chungchang leh, China map siam thar chungchangte chu an sawiho tura ngaih a ni.

G20 summit a thlen dawn lai leh, summit ṭan hmaa US President Joe Biden nen inkawmna hun nei tura ngaih a nih laia PM Modi Indonesia-a a zin hian ram pahnihte inkara thawh dunna tiṭha tura ngaihna a tilian hle. India dinhmun hrethiamin Indonesia pawhin summit pahnihte hi September 7 zingkaraa chawlh tawite chauh awma khar fel an tum tur thu an sawi ve bawk.

PM Modi hian ASEAN-India summit hi ram hrang hrang 10 hruaitute nen an hmang dawn a ni. Summit neih a nih hma hian Vietnam, Philippines, Indonesia, Malaysia leh Brunei te chuan China map siam thar an dodal thu an thlen vek bawk. East Asia summit-ah hian ASEAN ram 10 te bakah US Vice-President, Kamala Harris, Chinese Premier Li Qiang leh Russia foreign minister, Sergey Lavrov te an tel dawn bawk a ni. PM hi September 7-ah vek hian a rawn haw leh ang.