G20 summit thleng turin India a inpeih

India Presidency hnuaiah 2023 G20 summit chu New Delhi-ah nghah a ni dawn a, summit thleng tura inbuatsaihna pawh a hmawr bawk a ni ta.

September 9-10 chhunga neih tur summit-ah hian khawvel ram hrang hrang aṭanga ram hruaitu lo kalte chu prime minister Narendra Modi chuan a mal te tein Pragati Maidan-a hmun buatsaih thar, Bharat Mandapam-ah a lo dawngsawng dawn a ni. He hmunah hian PM hian Inrinniah G20 palaite chaw chhun a buatsaihsak dawn bawk a, hei bakah hian President-in zanriah a kilpui dawn bawk a ni. Ram hrang hrang hruaitute thlenna tur hotel pawh ruahman fel a ni tawh bawk.

New Delhi sorkar thuchhuahin a tarlan danin, New Delhi district pumpui chu September 8 zing aṭanga Pathianni thlengin 'controlled zone' a ni dawn. Delhi-a chengte ngei chauh luh leh chhuah phal a ni ang. Motor phalna nei bakah ei tur buatsaih ṭhin, in enkawltu, hotel leh hospital-a thawk te chu India Gate, C- Hexagon leh phal chin bikah an kal thei bawk ang. Sumdawnna hmun te, bazar, ei tur deliver-na leh delivery thil reng reng pawh chawlh lailawk vek tura tih a ni. Damdawi lam leh mamawh bik thilte a huam lo thung.

Delhi police-te chuan summit neih a nih chhunga khawpuia chet vel a awlsamna atan Delhi traffic kalphung an tidanglam bawk. Nizan dar 9 aṭangin bungraw phur motor lian luh phal a ni lo a, hei hian Pathianni zan zanlai thleng a huam ang. Taxi leh Auto te pawh Inrinni zing dar 5 aṭang chuan an service phalsak an ni dawn lo bawk. Delhi-a cheng mihring phurtu taxi, rel station leh airport pan leh tourist phur te chu an veivah phalsak an ni thung dawn a ni.

G20-a tel ram hruaitu lo kal thei lo tur zingah China president Xi Jinping, Russia President Valdimir Putin leh Mexico President Andres Manuel Lopez Obrador te chuan an kal theih loh tur thu an sawi chiang tawh. US President Joe Biden, Uk Prime Minister, Rishi Sunak, Fracne President, Emmanuel Macron, Canada PM Justin Trudeau, China Premier Li qiang, Australia PM Anthony Albanese, Germany Chancellor Olaf Scholz, Japan PM Fumio Kishida, South Korea President,Yoon Suk-Yeo, Saudi Arabia Crown Prince Mohammed Bin Salman, South Africa President Cyril Ramaphosa, Bangladesh Prime Minister Sheikh Hasin, Turkey President Tayyip Erdogan, Argentina President Alberto Fernandez leh Nigeria President Bola Tinubu te chuan an kal tur thu a tichiang tawh thung.