Bharat Jodo Yatra kum khatna champha thleng

Bharat Jodo Yatra a ṭan aṭanga kum khatna pualin, Congress party hruaitu Rahul Gandhi chuan Ningani khan yatra chu inhuatna tuh a la nih chhung leh India hi pumkhat a nih hma chuan a la chhunzawm tur thu a sawi. Rahul Gandhi hian Kanyakumari aṭanga Kashmir thleng, km. 4,000 chuang a kalna video siam chu anniversary pual hian X- ah a post bawk a ni.

Rahul Gandhi hian amah thlawptu leh India tan tiin September 7, 2022 khan Bharat Jodo kawngzawh hi a ṭan a, India chhim tawp Kanyakumari aṭanga hmar lam, Kashmir thleng kein a kal a ni. Hemi hun chhung hian public meeting 12 neiin, street corner meeting 100 chuang leh press conference 13 a nei hman a ni. Kawng lakah hian kal chunga mi kawmna hun vawi 275 chuang a hmang a, ṭhumuang chunga mi kawmna hun vawi 100 chuang a hmang tel bawk.

Bharat Jodo kawngzawhah hian khawtlanga mi chi hrang hrang an tel a, celebrity kan tih zingah, Kamal Hassan, Pooja Bhaat, Riya Sen, Swara Bhasker, Rashami desai, Akanksha Puri leh Amol Palekar te pawhin an zawm ve a ni. Ziakmi, sipai bang, Navy chief-admiral bang, leh RBI governor thlengin Gandhi kawngzawh hi an telpui bawk. Eptu party ṭhenkhat aṭang pawhin hruaitu eng emaw zatin an telpui a ni.

Bharat Jodo Yatra hi a hlawhtling hle a, mithiamte chuan Gandhi dinhmun vawrhtu leh politician satliah ni ṭhin kha, puitling leh beih thamah a siam ta a ni, an ti. Bharat Jodo Yatra bul ṭanna kum khat tlinna puala thu a sawiah, Gandhi chuan ,"Bharat Jodo Yatra hmanga kan ram hma hun atana inpumkhat tur leh inhmangaih tawnna nei tura pen tam tak kan pen khan kawng a su thui hle a ni," tiin, inhuatna a reh a, India chu pumkhat a nih hma chuan Bharat Jodo Yatra chu chhunzawm zel a la tum thu a sawi.