G20 palaite hman turin India siam Gita app chhawpchhuak dawn

Sorkar laipui chuan India-in digital khawvela a hmasawnna leh theihna pho lang turin G20 palai lo kalte hman theih turin GITA (Guidance, Inspiration, Transformation and Action) app a chhawpchhuak dawn. India-in G20 palaite tana thil chi hrang hrang a lo chhawpchhuah tur zingah AI hmang Gita app hi a tel a, he app kaltlang hian digital India temtir an tum thu an sawi.

Gita app an hman lai hian mimal thil zawhna, harsatna leh mihring nun chungchanga an hriat duhte an zawt thei dawn a, Gita app hian chhanna bakah, tihdan tur thlengin a hrilh thei dawn niin an sawi. App hi English leh Hindi-in a hman theih a, a hmangtu hian a aw hmanga a thunun theih tur thu Press Information Bureau (PIB) chuan an sawi. Gita app hian Hindu sakhaw lehkhabu Bhagwad Gita hmangin app hmangtu zawhnate hi a chhang ṭhin dawn a, a chhan pek reng reng hi Bhagwad Gita behchhan vek a ni dawn a ni.