SC thupek angin LAHDC inthlan hun tidanglam

Supreme Court-in notification thar chhuah tura thu a pek angin, Ladakh thuneitute chuan Ladakh Autonomous Hill Development Council (LAHDC) inthlan hun tura ruat tawh, September 10 chu October 4-a sawn a nih thu an puang.

Justice Vikram Nath leh Ahsanuddin Amanulla te ṭhutna bench hian inthlan dan tur chungchanga August 2-a Ladakh thuneitute thuchhuah chu hnawlin, Jammu & Kashmir High court division bench thuchhuah an khinna pawh a hnawlsak bawk a ni. Jammu & Kashmir high court division bench hian Jammu & Kashmir National Conference (JKNC)-in an party symbol atana 'leilehna' (plough) an hman a lo phalsakna chu Ladakh thuneitute hian SC-ah an hek a, he an hekna hi hnawlin SC chuan Rs nuai 1 a chawitir bakah inthlan chungchanga notification thar chhuah turin a ti hial a ni.

Ruahmanna hmasaah chuan LAHDC inthlan hi September 10-a neih a, September 14-a vote chhiar tur a ni a, Ladakh thuneitute'n notification thar an chhuahah erawh chuan October 4 -a inthlan tur niin, October 8-ah vote chhiar tur a ni dawn a ni. Vote thlak leh a kaihhnawih zawng zawng hi October 11 hmaa zawh fel tur a ni. SC thuchhuah zawm hian Ladakh election department chuan JKNC-in an party symbol atana leilehna lem an hman phalna a tichhuak tawh bawk.