Kum 4 chhungin bungrua Rs. vbc 1.8 chuang man hmuh let a ni

International Day of Police Cooperation hman ṭum khatnaa a thusawiah, Union Minister Jitendra Singh chuan kum 2014 aṭang khan Prevention of Money Laundering Act (PMLA) hnuaiah Rs. vbc 12 chuang man bungrua hum a nih thu leh, kum li ral ta chhung ringawt khan Fugitive Economic Offenders Act (FEOA) hnuaiah Rs. vbc 1.8 man chuang hmuh let a nih thu a sawi bawk.

Jitendra Singh chuan tunhnaiah, a bikin October 2022-a 90th Interpol general assembly India-in a thlen hnuah misual (sumdawnna bungrua tichingpen ṭhin) thawn let leh man an ngah zual thu a sawi. "UPA sorkarah khan hetianga misual thawn let hi pali te an awm ṭawk chauh a, kum 2014-a BJP sorkar hnu aṭang chuan hei hi 10-ah pung chhoin, kuminah hian misual 19 kan thawn let tawh a, 2022 leh 2021-ah mi 27 leh 18 ve ve kan la let tawh bawk," a ti.

International Day of Police Cooperation hmannaah hian an hnathawh ṭhat avangin CBI police 35 te chu Union Minister hian chawimawina a hlan a, CBI chu misual hnu chhui lama India hmachhuan leh eirukna tireh tura rin berte an nih thu a sawi. United Nations General Assembly-in December 16, 2022-a kum 2023 aṭanga hman ṭan tura September 7 International Day of Police Cooperation atana a puang chu lawmawm a tih thu a sawi bawk a ni.

Singh chuan International Day of Police Cooperation-ah hian 9th Interpol Liaison Officers Conference anga “Leveraging Interpol’s Operation Capabilities” leh “Utilisation of MHA Portal for International Mutual Legal Assistance” session an hman tel thu a sawi bawk.