J&K Lt. Governor-in firfiakte ṭanpui lo turin chah

Jammu and Kashmir Lt. Governor Manoj Sinha chuan Ningani khan inlak hran duh pawl awm tamna ṭhin, North Kashmir-a Sopore khua a tlawhnaah thu sawiin, khaw mite chu firfiak leh hel pawl mi leh sate lo thukru emaw, lo ṭanpui lo turin a chah.

Lt. Governor hian J&K aṭang chuan firfiaka chetna reng reng chu tihbo vek a duh thu a sawi a,"Sopore leh Jammu & Kashmir pumpuia chengte hian firfiaka che ṭhinte reng reng lo pui lo turin ka ngen duh che u. Hei chauh pawh hi in lo tih theih chuan kan police leh security force-te hian thuneitute ṭanpuina nen J&K aṭang hian firfiaka chetna reng reng hi kan um bo thei ngei ngei ang," tiin a sawi.

Sinha chuan J&K mipui zawng zawngte chu Lt. governor tan VIP an nih thu sawiin, inthliarna a awm loh thu a sawi a, mahni hlawkna chauh uma firfiaka chetna ṭanpui ṭhinte laka na taka action lak a tiam.

Sopore hian 1990 khan sipai helna nasa tak a lo paltlang tawh a, Hurriyat chairman hlui leh Jamaat-e-Islami member Syed Ali Shah Geelani pian leh seilenna hmun a ni bawk.