India-in G20 President nihna Brazil hnenah hlan

New Delhi-a G20 summit neih chu zawh fel a ni ta a, prime minister Narendra Modi chuan kum 2024 atana G20 President nihna chelhtu tur Brazil (President - Luiz Inacio Lula da Silva) kutah nimin khan G20 President nihna a hlan. Brazil hian December 1, 2023 aṭangin G20 President nihna a chelh ṭan ang.

India-in G20 summit a thlen chungchangah International Monetary Fund (IMF) first deputy managing director, Gita Gopinath chuan India chu a hlawhtling hlea a hriat thu a sawi a, PM Modi a lawmpuina thu hlanin India thu ken, 'One Earth, One Family, One Future' chuan G20 palaite rilru a hneh hle tih a sawi bawk.

PM Modi chuan,"Inrinni khan 'One Earth, One Family' session hmangin thil chi hrang hrang kan sawiho a, G20 hi 'One Earth, One Family, One Future' hmathlir neih theihna tur atana sulsutu a ni thei tur hi ka lawm tak zet a ni' tiin, a thu tawp a sawi. Modi chuan India chu November 30 thleng President a la nih dawn avangin tun summit neih zawh taka an thusawi bawhzuina thlir let a nih theih nan, November thlaa virtual meeting neih a rawt nghal bawk.

Brazil President Lula da Silva chuan PM Narendra Modi a lawmpuina thu sawiin, ram inrelbawlnaa mipuite tel tam theihna tur, mi zawng zawngin ei tur an neih theihna tur leh energy lama intodelhna chu G20-in a ngaihpawimawh zual tur thu a sawi. Lula chuan UN Security Council chuan an chak leh zual theihna turin ram ṭhang mekte permanent member atana an lak luh belh zel a ṭul thu a sawi bawk a ni.