G20 summit-ah Delhi Declaration pawm

Kum 2023 G20 summit-a kal khawmte chuan lungrual takin Delhi Declaration an pawm a, Delhi Declaration-ah hian ram zawng zawngte chuan an ram chin uluk taka vawng a, tihluihna hmanga midang ram la lo tur leh, khawvela remna leh muanna a lo awm zel theihna atan international humanitarian law pela che lo tura thutlukna an siam a ni.

China leh Russia ram hruaitute pawhin summit-ah hian tel lo mah se Delhi Declaration chu an pawm thu an sawi bawk. Summit-ah hian kum 2030 hmaa hman nawn theih energy chu khawvel puma a let thuma tam neih leh siam hman an tum thu an tarlang a, tuialhthei hman tlemna tura hmalak an tum thu an sawi bawk.

Delhi Declaration hi G20 ramte hian pawm mah se Russia-in Ukraine-a indo a chawh chhuah chungchangah Russia demna engmah sawi tel a ni lo a, hei hi Ukraine foreign ministry chuan lawmna tur an hriat loh thu sawiin,"Ukraine aiawh awm ve se la chuan ram telte hian he declaration leh Ukraine dinhmun hi an hriatthiam zual phah ngei ang," tiin an tarlang.

Hetih lai hian prime minister Narendra Modi chuan declaration hlawhtling tak an nei thei chu lawmawm a tih thu a sawi a, Delhi Declaration siam a nihna kawnga tha thawhtu, a minister leh official bakah ram dang official-te pawh an thawhrimna leh inpekna avanga chhuanawm a tih thu a sawi.

Delhi Declaration buatsaihna atan hian darkar 22 chuang inbiakna neih a ni a, meeting 300 chuang neiin, draft 15 zet an siam thu G20 Sherpa zinga mi Amitabh Kant chuan a sawi a ni.

Kumin summit-ah hian global trust deficit tihtawp te, Global Biofuel Allliance leh US, India, Saudi Arabia leh Gulf ramte thlun zawmna tur kawng ngaihtuah te chu an hmalakna tumna langsar zualte an ni. African Union chu G20 member nghet atana lak luh thar a ni bawk.