BJP hruaituin India chu Bharat-a thlak a nih tur thu a sawi

West Bengal-a Medinipur MP, BJP senior leader ni bawk, Dilip Ghosh chuan India hming chu Bharat tiha thlak a nih tur thu leh, Kolkata-a foreigner-te lim awm zawng zawng chu lak bo vek a nih tur thu a sawi.

BJP national vice president pawh lo ni tawh, Dilip Ghosh chuan a constituency chhunga awm Kharagpui city-a thu a sawinaah, "Kan party-in sorkarna kan siam hunah chuan foreigner-te lim zawng zawng hi lak bo vek a ni ang a, India tih pawh hi Bharat tihin kan thlak ang. Kan thiltih tur duh lo apiang chuan an chhuahsan thei ang," tiin a sawi. Dilip Ghosh thusawi thlawp hian West Bengal-a BJP hruaitu pakhat, Rahul Sinha chuan ram pakhatin hming pahnih a neih chu a rem loh thu sawiin, khawvel ram hruaitu hrang hrangte G20 summit hmanga Delhi-a an awm lai hi ram hming thlakna atana hun ṭha ber a ni, a ti ve bawk.

Hetih lai hian West Bengal-a sorkar lai, Trinamool Congress thupuangtu, Santanu Sen chuan BJP hruaitute thusawi chu a thlawp loh thu leh, BJP chuan INDIA an hlauh avangin harsatna tak tak kan hmachhawn mek leh thil pawimawh zawk aṭanga mipui rilru lak pen nan chutiang thil chu an buaipui mai mai niin a sawi ve thung.