Saudi Crown Prince leh PM Modi te'n meeting nei

New Delhi-a G20 summit hmanga rawn kal, Saudi crown prince Mohammed bin Salman chu India-ah la cham chhunzawmin nimin khan prime minister Narendra Modi nen meeting an nei. Tlai lama president Droupadi Murmu nen inkawmna hun an hman leh hnuin Saudi Arabia panin a haw.

Saudi Crown Prince tan hian Rashtrapati Bhawan-ah ceremonial reception buatsaih a ni a, hemi hnu hian PM Modi nen Hyderabad House-ah meeting neiin India-Saudi Strategic Partnership Council meeting hmasa ber minute-ah a hming a ziah hnan a ni. Meeting-ah hian ram pahnihte insumdawn tawnna chungchang bakah, economy-a inpuihna turte, ralthuam chungchang leh ram pahnihte culture aṭanga inzawmna thuk zawk neih thu te an sawi. Ram pahnihte'n kawng hrang hranga an thawh dunna tihnghehna tur atana thil pawimawh chi hrang hrang an sawi bawk.

PM Modi hian kum 2019 khan Saudi Arabia hi a lo tlawh tawh a, Saudi nena Joint Committee on Defence Cooperation (JCDC) an neih thu leh an inhmuh fo thu a sawi. Ram pahnihte'n duh leh tum thuhmun neia, ralthuam leh ram venhimna hna thawh kawnga an rilru a inan thu sawiin, Saudi leh India hian ram ang mai pawh ni lo, a ram mipuite aṭanga inzawmna thuk tak an neih thu a sawi. Saudi Arabia Crown Prince, Mohammed bin Salman pawh hi India a rawn tlawh ṭum hnihna niin, February 2019 khan India hi a tlawh tawh a ni.

India hi Saudi Arabia sumdawnpui lian ber pahnihna a ni a, Saudi Arabia pawh India sumdawnpui lian ber palina a ni ve bawk. India-in crude oil a lak luh zinga 18% hi Saudi Arabia aṭanga lak luh a ni a, oil bakah hian energy sector-ah pawh insumdawn tawnna lian leh ṭha tak an nei a ni.