'One nation, one election' hi inthlan ṭhulhtir tumna a ni : Prashant Bhushan

Supreme Court lawyer leh activist ni bawk, Prashant Bhushan chuan sorkar laipuiin 'One Nation, One Election' (ONOE) kalpui a tum hi tun hnaia state pangaa inthlan lo awm tur ṭhulhna tur atana a hmanrua a ni, a ti. Kumin kum tawpah hian Madhya Pradesh, Rajasthan, Chhattisgarh, Telangana leh Mizoram te chuan assembly inthlan an hmachhawn dawn a ni.

Bhushan chuan,"India anga parliamentary democracy angah chuan sorkar lai hian an tamna hlohin term laklawhah pawh an sorkarna a tawp thei a, chutiang hunah chuan inthlan ṭhat a ṭul ṭhin. One Nation One Election hi hman a nih erawh chuan chutiang ang dinhmun kan thlen hunah chuan Presidents' rule puan a ngai ang a, democracy, mipui sorkarna kha thai bo a ni dawn a ni," tiin ONOE chuan democracy aṭangin presidential system-ah min luhpui thei dawn niin a sawi.

"Sorkar lai hian heng zawng zawng hi a hria a, President rule system-a lut tur pawhin constitution siam ṭhat a ngai nasa tih a hria. Tuna sorkar hian Rajya Sabha-ah majority an nei lo a, mahse, ONOE hi an rawn vawrh ta tho a ni. Hei hian an tum chu a tichiang khawpin a lang. BJP hian state pangaa assembly inthlan awm turah hian hnehna chan an inbeisei lo a, chuvangin, ONOE hmanga kum 2024 Lok Sabha inthlan thleng tihkhawtlai a, President rule lo puan hi an tum ber a ni," a ti.