Damdawi lem pahnih chungchangah DCGI-in hriattirna tichhuak

Drugs Controller General of India (DCGI) chuan World Health Organisation (WHO) thuchhuah zulzuiin, Thin damdawi 'Defitelio' leh Takeda cancer damdawi inchiuna 'Adcetris' lem ni ngeia hriat zawrh chhuah chungchangah state leh UT zawng zawng tan hriattirna a chhuah.

DCGI chuan WHO-in hriattirna a tihchhuah thu hi tarlangin, cancer veite inchiuna, Takeda Pharmeceutical Company Limited siam, Adcetris 50mg lem chu ram paliah hralh a nih thu leh, heng ram zingah hian India pawh a tel tih a sawi. Thin damdawi atan hman, 'Defitelio' 80mg/ml lem hi India-ah pawh hmuh tel a nih thu WHO chuan an tarlang a, heng damdawi lemte hi dan dik lo leh endikna tel loa sem chhuah niin an sawi.

Doctor leh healthcare lama thawkte reng reng chu damdawi an chawh turah fimkhur tura chahin, an damlo enkawlte pawh damdawi side effect nia hriat thilah chik zawka en turin a chah bawk."Heng damdawi lemte hi damlote tana lei mai theihin a awm a, dan hnuaia lei leh lak ni lo, damdawi zawrhna hmun thleng hi a tam em em a ni. Hetih lai hian dan anga damdawi lak zingah pawh a tel tho a, WHO pawhin heng damdawi lemte hi chi hrang pariat lai awmin an sawi bawk. Damdawi leitu leh damlote bakah, damdawi chawhtu leh zuartute pawhin dan dik tak leh hriat chianna hmun ngeia mi chauh damdawi lei, chawh leh zuar turin kan chah a ni," tiin an thuchhuahah chuan an tarlang.