West Bengal-in SEP hmang dawn

West Bengal Education department chuan State Education Policy (SEP) thar duangin, New Education Policy (NEP) hmang loa State Education Policy an hman tur thu a puang. SEP-ah hian a hmaa an kal dan pangngaia school-a pawl san chhoh dana 5+4+2+2 chu an la hman chhunzawm tur thu an sawi.

West Bengal sorkar hian April 2022 khan SEP ngaihtuah tur leh state-in NEP aia SEP a ṭhatpui dan tur bakah NEP aia ruahmanna ṭha zawk ngaihtuah tur expert committe a din a ni.

Education department thuchhuahah chuan,"Education system kan hman mek siam ṭhat chungchang chu state sorkarin ngaihtuah ṭhat ṭulin a hria a, West Bengal-a pre-primary aṭanga higher thlenga zirna kalphung siam ṭhatna tur hi expert committee committee hian uluk taka ngaihtuahna a sen hnuah, West Bengal-a zirna kalpui dan turah state sorkar hnenah thurawn a pe a, state cabinet chuan draft SEP, 2023 chu a pawm a ni. Zirlai zawng zawng, mi rethei, chan chhe zawk leh hnam anga tlem zawkte tan pawha ban phak tur zirna, State Education Policy, 2023 chu West Bengal-ah hman a ni dawn a ni," tiin an tarlang.

Tuna zirna an kalpui dan aia SEP danglamna awm chhun nia lang chu bul ṭanna atana Anganwadi centre-a kum hnih kal ngai tur chauh hi a ni. Hemi hnu hian pre-primary (kum khat) an kal chho leh anga, a bak chu dan pangngai angin, primary, upper primary, secondary leh higher a ni ang tiin eduation department chuan an sawi.