India ramah Covid-19 kai nuai 84 chuang awm tawh

India ramah Ningani khan Covid-19 kai hmuh chhuah thar mi 47,638 an awm leh a, Nilaini aiin hri kai hmuh thar hi 5% in an tlem zawk. 

Ram pumah hri kai hmuh tawh hi mi 84,11,724 an tling tawh a, mi 1,24,985 in an thihpui tawh a ni. Hri kai zinga 77,65,966 chu enkawl an ni tawh bawk. 

Maharashtra chu state zingah hri kai tamna ber a la ni chhunzawm zel a, hri kai hmuh tawh hi mi  17,03,444 an tling tawh a ni. Maharashtra bakah Karnataka, Andhra Pradesh, Tamil Nadu leh Uttar Pradesh-te chu hri kai tam zualna state zingah an tel. 

Kar sarih chhung chu ram pumah Covid-19 vanga thi an tlahniam tawh a, ni 34 chhung chu nitinin hri kai hmuh chhuah thar aiin enkawl dam an tam tawh zawk bawk. Ningani bik khan hri kai enkawl dam hi mi  54,157 an awm a ni. Recovery rate hi 92.32% a ni tih union health ministry data chuan a tarlang. 

Hetih lai hian Delhi-ah chuan hri kai an pung chak leh hle a, ni thum chhung chu nitin hri kai hmuh thar hi 7,000 dawn an tling zel a ni. Delhi High Court chuan khawpui chhunga hri kai an pung thar leh nasa chu ngaihtuah a ngai hle tih sawiin, Delhi chu 'corona capital' a ni thei mai dawn a ni, a ti.

University Grants Commission (UGC) chuan Ningani khan college leh university hawn chungchanga kaihhruaina thar a tichhuak. 

Hripui leng vangin ram pumah March 16 aṭang khan university-te khar a ni a, thla riat dawn khar an nih hnuah hawn ṭan a ni tawh dawn a ni. 

Guideline tharah hian central university leh centrally funded higher education institution-ten campus an hawn leh hawn loh chungchang chu Vice-Chancellor leh institution head-te kutah dah a ni. State university leh college chungchanga thutlukna chu state sorkar kutah dah a ni  bawk. 

UGC kaihhruaina tihchhuah chuan kar khatah ni ruk class kal a, class-ah pawh physical distancing kalpui a nih theihna tura ṭhutna rem dan pawh siam rem turin a ti. Campus-ah isolation facility siam vek tur leh, zirlai, zirtirtu leh staff-te chu Covid-19 screening neihsak vek turin a ti bawk a ni.