Bangladesh-in Covid vaccine lei nan India inremna siampui

Britain rama damdawi siamtu AstraZeneca siam, India-a en­chhin­na neih pui mek Covid-19 vaccine chu peih fel a nih hunah, dose maktaduai 30 an chan theih nan Bangladesh chuan India chu inremna a ziahpui.

Bangladesh khaw­pui Dhaka-ah, India-a Serum Institute of India (SII) nen inremna an ziak a ni. "SII-in enchhinna a neih mek vaccine hi hman theiha peih fel a nih hunah dose mtd 30 chu Bangladesh miten kan chan ve theih nan SII chu inremna kan ziahpui ta a ni," tiin Bangladesh health minister Zahid Maleque chuan a sawi. 

Dose mtd 30-te hi thla tin dose mtd 5 zelin Bangladesh-a damdawi siamtu, Beximco Pharmaceuticals Ltd kaltlanga lakluh a ni ang. Heng vaccine-te hi Bangladesh-a cheng mipui maktaduai 15-te tana ruahman a nih thu Maleque chuan a sawi a, mi pakhat hian dose hnih zel an la thei tura beisei a nih thu pawh a sawi bawk.

SII hian vaccine an enchhin mek hi an peih fel huna India-a a zawrh chhuahna tur man an bithliah angin Bangladesh-ah hian zawrh a ni ve dawn tih Maleque chuan a sawi. Dose khat man zat hi US dollar 4-5 vel tura beisei a ni. SII bakah Bangladesh hian World Bank leh Asian Development Bank-te a thawhpui bawk a, vaccine dose tam tham tak an neih theih nan hian an thawhpuite kaltlang hian sum leh pai an puk dawn a ni. 

Mithiam ṭhenkhatte chuan tun thlasik lo thleng turah Bangladesh-ah hian Covid-19 hri a punlun dawn niin an sawi a, hei vang hian an ram hruaitute chuan hri leng darh tur venna atan hma an la  mek a ni. Nimin thleng khan chuan Bangladesh-ah Covid-19 hri kai hi mi 4,16,006 an awm tawh a, heng zinga mi 3,33,588 chu enkawl dam tawh niin, he hri thihpui hi mi 6,021 an awm tawh bawk.