Congress-in G20 budget chungchangah BJP sorkar sawisel

Congress party chuan prime minister Narendra Modi kaihhruai BJP sorkar chu G20 summit neih zawh taka budget ruahman aia tam hmangah puhin, G20 summit a zawh tawh hnuah chuan ram chhunga ngaihtuah hmasak ngai, thil man sang, hnathawh tur vang leh Manipur tualchhung buaina te ngaihven tawh turin an ti.

Congress general secretary KC. Venugopal chuan,"G20 summit atana budget siam hi Rs. vbc 990 a ni a, BJP sorkar hian Rs. vbc 4,100 a hmang a ni. Covid-19 hri len hnuah khawvel ram sorkar zawng zawngin pun khawmna atana an sum hman an tihniam vek a ni. Entirna ṭha tak chu Bali summit thlengtu Indonesia pawh khan India sum hman 10% aia tlem daih, Rs. vbc 364 chauh a hmang a ni," a ti.

Venugopal chuan sorkar laipui hian tuialhthei man tihtlawm te, an thlai thar tam tak chantu loneitute ṭanpui te, tuilian tihbuai Himachal Pradesh siam ṭhatte aiin an hmel mawina atana budget pela sum hman a thlang ta zawk a ni, a ti. "Beautification drive za tam tak pawhin he ram sorkar sum dinhmun chhiatna hi a thup zo chuang lo ang. Mipui sum luan ralna chu G20 summit neihna hmun, Bharat Mandapam hmuna tui tling hian a tilang chiang ber awm e," tiin a sawi.

Party president Mallikarjun Kharge pawhin BJP sorkar chu inthlan hmachhawnna atana mipui sum hmangah a puh. "Modiji hian thudik thup a tum a, mahse, mipuite hian thudik chauh hriat an duh a ni, rilru lak penna hmanrua atana boruak siam chawp thil mai mai ni loin," tiin, mipuite chuan kum 2024 inthlanpui atan BJP sorkar tlakna tur kawng an sial mek niin a sawi. Kharge chuan,"Chaw plate khat chu August thla aṭangin 24% zetin a pung a, hna nei lo pawh 8% in an pung bawk. Modi kaihhruai sorkar kal dik lo hian eiruknaah min hruai lut a ni. CAG report aṭang pawhin BJP thiltih dik loh chu a lang zel a, Jammu and Kashmir-a Jal Jeevan hnuaia Rs. vbc 13,000 chuang bote kha, a hai langtu Dalit IAS officer pawh sawisak hial a nih kha," tiin a sawi.