PoK hi India-ah a la bet ang : General VK Singh

Union minister ni lai leh Army hotu hlui, General VK Singh chuan Pakistan Occupied Kashmir (PoK) chu India ramah a la bet vat dawn niin a sawi.

BJP-in Dausa, Rajasthan-a Parivartan Sankalp Yatra (PSY) programme an hmannaah VK Singh hian PoK-a Shia muslim-te'n border hawng tura an phutna chungchang zawhna a chhannaah a sawi a ni.

Rajasthan-a sorkar lai, Cogress chu dan leh hrai kenkawh kawnga hlawhchhamah puhin, "BJP-in PSY a huaihawt a ngaih tak chhan pawh hi Rajasthan-a Congress sorkar nep vang a ni. PSY hmang hian mipuite nena hun hmangin, an thusawi duhte kan ngaihthlaksak dawn a ni," tiin, thlawpna an hmuh ṭhat thu a sawi.

Assembly inthlan lo awm tura BJP-in Chief Minister candidate atana an dah tur zawhna chu VK Singh chuan khawi hmunah mah BJP-in chief minister candidate tur an siam ngai loh thuin a chhang a, Prime Minister theihna rinchhan chauha inthlan an hmachhawn ṭhin thu a sawi. "Party hian mi ṭha leh rinthlak, mipuite duh zawng ngei hruaitu atan kan dah dawn tih hi mi zawng zawng hian ring tawp mai rawh se," a ti.