Kerala-ah Nipah virus chi thar hmu chhuak

National Institute of Virology (NIV), Pune chuan Thawhlehnia Kerala-a mi pahnih thihna thlentu natna chu Nipah virus a nih thu an tichiang tawh a, mahse, Nipah chi thar niin, a hmaa Nipah virus an hriat aiin inkai chhawn har deuh zawk mah se, thihna chance a sang zawk niin an sawi. Tun dinhmunah, Kerala, Kozhikode district-ah hian Nipah kai mi pali hriat chian an ni tawh a ni.

Indian Council of Medical Research (ICMR) chuan Nipah kaite enkawlna damdawi, monoclonal antibody phurh luh a remti tawh a, hei bakah NIV, Pune pawhin Kozhikode Medical College-a test nei tur leh bak dinhmun zir chiang turin mobile lab an tir tawh bawk niin state sorkar chuan a sawi. Tun dinhmunah khaw pasarih; Atanchery, Maruthonkara, Tiruvallur, Kuttiyadi, Kayakkodi, Villyapalli, leh Kavilumpara te chu containment zone-a puan an ni tawh bawk.

Kerala health minister Veena George chuan an state-a Nipah virus chi thar hmuh chu Bangladesh variant a ni tih sawiin, mihring leh mihringa inkai chhawn theih, kai chhawn awlsam tak ni lo mah se thihpui theihna chance sang tak ni si a ni, a ti. Health minister chuan NIV, Pune aṭangin mithiam an lo kal tur thu leh, hri leng zirnaa mi thiam (epidemiolgists) te chuan nimin khan Chennai aṭangin Kerala an lo thlen tawh thu leh zir chianna an neih tur thu a sawi bawk.

Nipah virsus hi ran leh mihringa inkaichhawn theih a ni a, he hri thehdarhtu ber chu bak chi khat, fruit bats an ni a, vawk leh mihringin an kai chhawng ve leh bawk a ni. Nipah virus kaite chuan khawsik, lu na, lu hai, tha na, luak chhuak leh kaw ṭha lo te an nei a, a nasat hnu chuan an thluak thlenga nghawngin, thluak a vung a, thihna hial a thlen thei a ni.