INDIA coordination committee ṭhu khawm

Eptu ṭangrual pawl, Indian National Developmental Inclusive Alliance (INDIA) coordination committee chu nimin khan Delhi-a Sharad Pawar-a inah ṭhu khawmin, tun hnaia state assembly panga; Madhya Pradesh, Chhattisgarh, Mizoram, Rajasthan leh Telangana te-a inthlan lo awm turah INDIA anga an chuhho dawn leh dawn loh an sawi.

INDIA hian meeting an neih hnuhnun ber ṭum, Mumbai-ah khan coordination committee hi an din a, inthlan chungchanga hmalakna lo ngaihtuah tur leh pawl anga an chetna tur zawng zawng lo ngaihtuah tura din a ni. Meeting-ah hian kum 2024 Lok Sabha inthlan atan chauha chuhho tur nge an nih state assembly inthlan pawh an chuhho dawn tih te, seat insem dan turte sawi a ni.

Party hrang hrang intel khawm an nih avangin Mumbai-a meeting neihah khan seat sem dan tur hi a rang lama tihfel a ṭhat thu leh an duh thu Trinamool Congress, JD(U), AAP leh RJD te chuan an lo sawi tawh. Madhya Pradesh-a Samajwadi Party hruaitute pawhin,"Meeting vawi thum kan nei tawh a, mahse, INDIA hian Lok Sabha inthlan atan chauh nge, state inthlan pawh kan chuhho dawn tih hi kan la sawi lo. Party tinin ruahmanna kan siam thiam theih nan hei hi kan hriat chiana kan hriatthiam tlan a ngai a ni," tiin an sawi.

INDIA coordination committee-ah hian member 14 an awm a, nimina Sharad Pawar-a ina ṭhu khawm zingah hian Trinamool Congress aṭanga tel member pahnih chuan Enforcement Directorate (ED) hmaa an party hruaitu Abhishek Banerjee a inlan dawn avanga an tel theih loh tur thu sawiin, CPI(M) pawhin an tel theih loh tur thu hi an sawi ve bawk.