Eptu MP-in Parliamentary panel thu lak dan sawisel

Criminal law thlakna tur bill pathum endikna neia ṭhu khawm, Parliamentray Standing Committee on Home Affairs-a eptu member MP pakhat chuan meeting-na eptu MP-te thusawi ngaihpawimawh a nih loh thu sawiin, parliamentary panel chairperson leh BJP MP ni bawk, Brij Lal hnenah a lungawi lohna ziakin a thlen.

Bill thar endikna leh sawihona neiin parliamentary panel hi Thawhlehni khan a ṭum lina atan an ṭhu khawm a, meeting-ah hian a hma ni-a eptu party lian tak pakhat MP-in meeting thu lak dana a lungawi lohna chairperson hnena ziak a thlen thu hi hriat a ni. Lehkhaah hian eptu party member-te chu thusawina hun mumal pek an nih loh thu a sawi a, an bill endik pawimawhzia ngaihtuahin member-te chu hmanhmawh tura innawrna chi nia a ngaih loh thu a sawi. Eptu MP hian member-te rawn loa committee-in mithiam a koh ṭhin thute a sawi lang bawk.

A hming tarlan loh MP hian a lehkha theh luhah hian meeting hnuhnung pathum minute-ah eptu MP-te ngaihdan tarlan a nih ve loh thu a sawi. August 24-a DMK MP, Dayanidhi Maran thusawi, an bill sawiho lai hming atana Hindi hming hman nasat lutuk a ṭhat lohna a sawi pawh minute-a tel ngei tura ngaih a nih laia a tel lo chu mak a tih thu a sawi tel a ni.

Parliamentary standing committee on home affairs hian criminal law pathum; Indian Penal Code, 1860; the Code of Criminal Procedure, 1898; leh the Indian Evidence Act, 1872 thlakna tur bill Bharatiya Nyaya Sanhita Bill, 2023; Bharatiya Nagarik Suraksha Sanhita Bill, 2023; leh Bharatiya Sakhshya Bill, 2023, Lok Sabha-in a pass tawhte en dikin meeting an nei a ni.