Parliament special session agenda tur tichhuak

Sorkar laipui chuan September 18 - 22 chhunga neih turin parliament special session a ko a, session-ah hian parliamet-in kum 75 chhunga a thlen tawh chin kawng hrang hrang sawiho a ni dawn.

Lok Sabha secretariat bulletin tihchhuah aṭanga a lan danin, special session-ah hian 'Parliamentary journey of 75 years starting from Samvidhan Sabha - Achievements, Experiences, Memories and Learnings' tih chu an sawiho ang. Hei bakah hian legislative Bill pali sawiho a ni dawn bawk a, chungte chu - Chief Election Commissioner ruat dan chungchang te, Post Office Bill te, Advocates Bill leh Press and Registration of Periodicals Bill te an ni.

Ni nga awh parliament special session agenda tur hi hun rei tak chhung hriat a nih loh avangin eptu party hrang hrang MP-te lu a tihai a, G20 summit chhunga thiltihnaah 'India' tih aia 'Bharat' hman a nih avangin special session-ah hian India hming thlakna tur sawiho a nih rinna a lian hle. 'One Nation, One Election' zir chiang tur panel din a nih avangin ONOE chungchang sawiho neih a nih ring pawh an tam hle.

Congress hruaitu Sonia Gandhi chuan parliament special session agenda tura a rinte ziakin prime minister Narendra Modi hnenah lehkha a thawn hial a ni. Congress hruaitu, Jairam Ramesh chuan,"Sonia Gandhi nawrna a zarah sorkar pawhin special session agenda tur a tichhuak thei hram e. Tuna agenda kan hmuh aṭang hi chuan eng thil pawimawh mah a awm lo, November-a winter session neih huna sawi theih vek a ni," tiin X-ah a tarlang.

India hian zalenna a hmuh aṭangin kum 75 a tling tawh a, kum tluana Azadi ka Amrit Mahotsav hman chhan pawh a ni. India zalennain kum 50 a tlin kumah pawh khan special session hi koh a lo ni tawh a, August 15, 1997 khan midnight session koh a ni tawh bawk.