INDIA committee-in TV show boycott leh seat insem sawiho

INDIA coordination committee chu Nilaini khan Delhi-a Nationalist Congress Party (NCP) hotu, Sharad Pawar-a inah an ṭhu khawm.

Meeting-ah hian kum 2024 Lok Sabha inthlan chuhho leh state assembly inthlan chuhho chungchang sawiin, state assembly inthlan lo awm tur atana seat insem an rel a ni. Coordination committee ṭhu khawm hian television anchor ṭhenkhat leh show ṭhenkhat boycott an tum thu an sawi bawk.

State hrang hranga inthlan lo awm tur atan hian INDIA-a tel party hrang hrangte chuan seat insema inthlan chuh an tum thu hi an sawi a, kumina state inthlang hmasa ber tur, Madhya Pradesh-ah joint rally an nei nghal dawn niin an sawi. Madhya Pradesh hi October thlaah an inthlang dawn a ni. DMK hruaitu, TR Baalu chuan ṭangrual party-a tel hrang hrangte'n joint rally an neih tur thu hi sawiin,"Seat chuh tur insem turin thutlukna kan siam a, state hrang hrang atana seat insem dan tur hi sawiho vat a ni ang. State inthlang hmasa turte kan ngaipawimawh dawn a, October kar hmasa berah hian Bhopal-ah rally neih kan tum a ni," a ti.

Nilainia ṭhu khawm, coordination committee chuan TV show ṭhenkhat leh anchor-te boycott an tum tih sawiin, an hruaitute leh an media subgroup-te'n show leh anchor an boycott turte an la thlang dawn niin an sawi. Eptute hian media ṭhenkhat chu Rahul Gandhi-a'n Bharat Jodo Yatra a neih lai aṭang tawh khan an cover ṭha duh lo niin an sawi a, social media leh mipui thlawp a hlawh viau laiin media ṭhenkhat chuan an boycott a ni an ti. Congress hian May 2019 khan TV show hi an lo boycott tawh a, thla khat chhung chu TV-a lanna tur reng rengah aiawh intir duh loin, media lam pawh sawmna thawn lo turin thuchhuah an lo siam tawh hial a ni.