PM Modi-a'n Rs. vbc 50,700 man project lungphum a phum

Prime minister Narendra Modi chuan nimin khan assembly inthlan hmachhawn mai tur, Madhya Pradesh-a Bina refinery-a petrochemical complex leh industry 10 sakna tura lungphum a phum a, heng project atan hian Rs. vbc 50,700 ruahman a ni.

Prime Minister chuan project-te hi state hmasawnna tur atana kawng sialtu a ni dawn a ni tiin mipuite chu India-in G20 summit hlawhtling tak a thlen avangin lawmthu a hrilh. Hemi rual hian Madhya Pradesh-a hun rei tak rorel tawh, Congress sorkar chuan engmah a tihsak loh thu a sawi.

Bharat Petroleum Corporation Limited enkawl, Bina refinery tihchangtlunna atan hian Rs. vbc 49,000 ruahman a ni a, he refinery hian ethylene leh propylene Kilo-Tonne 1,200 kum khat chhungin a siam thei dawn a ni. Ethylene leh Propylene te hi damdawi bakah, textile leh thil pack-na ang chi siamna sector te mamawh em em a ni a, tualchhunga siam chhuah a tam hian ram dang aṭanga lak luh a tihhniam theih beisei a ni. Hei hi PM hmalakna, 'Aatmanirbhar Bharat' hlawhtlinna tur a ni tiin sorkar official thuchhuah chuan a tarlang. Heng project-te hian petroleum sector a chawikan dawn bakah, hna thar tam tak a siam belh beisei a ni.