Punjab airbase beihnaah firfiak panga thah an ni

India leh Pakistan ramri aṭanga 40km leka hlaa awm, Punjab airbase chu Inrinni zing dar 3:30 khan firfiakten an bei a, darkar 17 chhung an inkah hnuah National Security Guards leh Indian Air Force (IAF) te chuan firfiak panga an kap hlum, thi zinga pakhat chu Nasir Khan a ni tih fianfiah a ni.

Prime Minister Narendra Modi-a'n Pakistan khawpui Lahore a tlawh hnu lawka he thil thleng hian mipui a barakhaih hle. Pakistan firfiakten an beih hmun hi Mig-21 fighters, MI-25 leh MI-35 attack helicopters dahna hmun a ni a, PTI-in a tarlan dan chuan India-in Afghanistan hnena MI-25 copters panga a pekna hmun kha a ni nghe nghe.

Inkahnaah hian fiarfiak bakah venghimtu lam pathum an thi a, thi zinga pahnihte hi Gurdaspur mi niin an zinga pakhat chu Air Force commando a ni.

Pawikhawihtu Pakistan firfiakte hi December 30-31 chhunga ramri kana rawn lut ru nia ngaih an ni a, tualchhung mi zingah anmahnin lo ṭawiawmtu an awm ngei nia ngaih niin uluk taka zirchianna beihpui neih chhunzawm nghal a ni.

Punjab Police senior tak pakhat chuan, "Khawi hmun pawh hi uluk taka en reng a ni a, pawi khawihtu leh he thila inhnamhnawih kan zawn chhuah kim hma chuan he hma-lakna hi chhunzawm tur a ni ang," a ti.

Union Home Minister Rajnath Singh chuan, "Kan ram ṭhenawmte nen thawhhona neih reng kan duh a, boruak ṭha neih pawh kan duh. Amaherawhchu, firfiaka beih kan tawhnaah hian pawikhawihtu ngaihhnathiamna a awm lo ang," a ti.