BJP a mal din dawn - Naqvi

BJP leader leh Union minister ni bawk Mukhtar Abbas Naqvi chuan nakkuma Uttar Pradesh Assembly elec-tion neih turah BJP chuan thawhpui an nei dawn lo a, anmahni party malin an din tur thu a sawi.

Naqvi chuan, "Kum 2017 Uttar Pradesh Assembly election-ah chuan BJP chu kan maldin dawn a, sorkarna pawh kan siam ngei ang. A nihna takah chuan Congress hian kan ramah hmasawnna tak tak an thlen thei lo a, eirukna an vulh lian chauh zawk a ni," tiin Congress party chu na takin a sawisel.

Naqvi chuan Cong-ress vice president Rahul Gandhi-a'n Europe-a kum thar lawm tura a zin chungchang sawiin, "Tu pawhin an duhna hmunah kum thar chu an lawm thei alawm. Eng emawah hlawkna chu a awm mahna," a ti.

Nikum November thlaa civic body polls an neihah BJP hi an che ṭha tawk lo a, Prime Minister Narendra Modi bial Varanasi-ah chuan seat awm 58 aṭanga 50 chu an hloh a, Home Minister Rajnath Singh-a bial Lucknow-ah pawh seat 28 awm aṭangin seat li chiah an la a, Union Minister Kalraj Mishra-a bial Deora-ah pawh seat 56 aṭangin seat 46 ngawt-ah an chak lo a ni.