SC-in National Judicial Data Grid zawm

India rama court zawng zawngin court case lak, case kal lai pending leh hnawlte an dah khawmna, National Judicial Data Grid (NJDG) chu Supreme Court chuan a zawm ve tawh dawn niin Chief Justice of India, DY Chandrachud chuan Ningani khan a sawi.

"Supreme Court-in NJDG-a zawm ve tak avang hian Supreme Court data zawng zawng chu NJDG portal-ah hian hmuh theihin a awm dawn tihna a ni. Mi zawng zawng tan awlsam tein Supreme Court chungchang te, case hnawl leh pending mek te, a kum bi leh a thlen tawh chin bakah, qourum wise angte pawhin chawp leh chilhin a hmuh nghal zel theih tawh ang," tiin Chief Justice Chandrachud chuan a sawi.

Chandrachud chuan, NJDG-SCI portal-ah hian civil leh criminal case, a hma thlaa case lak leh hnawl, three-judge, five judge leh nine-judge bench hmaa case pending awm zat zawng zawngte pawh hmuh theihin tarlan vek a ni dawn a ni, a ti.

Supreme Court thuchhuahin a tarlan danin NJDG-SCI portal hi National Informatics Centre chuan Supreme Court Registry-a software development team, Computer Cell te thawhpuiin an buatsaih a ni. "National Judicial Data Grid-a Supreme Court a tel tak avang hian e-court buatsaihna tura kan hmalakna chu a fel ta a ni. Tunah chuan court chhawng thum kan neih zawng zawngte NJDG portal-ah an awm kim ta. NJDG hi India sorkar hnuaia hna tiawlsamtu zinga mi a ni," tiin thuchhuahah chuan an tarlang.

NJDG-SCI portal-a a lan danin kum 2023 chhung hian Supreme Court-ah case register si, pending mek 64,854 a awm a, register lo 15,490 a awm bawk a ni. Three-judge bench ngaihtuah tur- 583, five-judge bench ngaihtuah tur- 288, seven-judge bench ngaihtuah tur- 21 leh nine-judge bench ngaihtuah tur-135 te chu pending a ni bawk. Supreme Court-ah hian August thla chhung khan case file 5,412 a awm a, 5,033 te chu hnawl a ni bawk.