Odisha-ah primary school zirtirtu nuai 1.3 nuar

Odisha-a sorkar school-a primary zirtirtu 1,30,000 chu nawrh huaihawtin a huhoin chawlh an la a, vawiin hi ni kua an chawlhna tur a ni tawh. Zirtirtute nawrh vang hian school 54,000 vel khar a ni mek a, zirlai nuai 40 chuang chu school kal thei loin an awm a ni.

Odisha-a primary school zirtirtute hian sorkarin contract hmanga zirtirtu a rawih ṭhin titawp tur leh old pension scheme kalpui leh ngiatin an nuar a ni. United Primary Teachers Federation hnuaiah intelkhawmin, September 8 aṭang khan an nuar ṭan. An thil ngiatte sorkarin a tihhlawhtlinsak theih loh avangin heng zirtirtute hian mass leave an la a, Block Education Officers (BEO) office kawtah kal khawmin an nawrh hi an chhunzawm a ni.

Eptu party pahnih, BJP leh Congress pawhin Odisha sorkar hmalak dan chu sawiselin ni eng emaw zat a liam hnuah pawh sorkar chuan zirtirtute ngenna chu a ngaihsak lo niin an sawi. State BJP thupuangtu, Anil Biswal chuan sorkarin tumna a neih loh avangin state puma zirna a chhe ta vek a ni tiin,"Sorkar hian secretary pakhat thlawhna chuanna tur atan Rs vbc 500 a sen theih laiin, engvangin nge zirtirtute hlawh a pek ṭhat theih loh?" a ti. State Congress president, Sarat Pattanayak pawhin Odisha-a zirna chu emergency ang maiin a buai a, sorkar chu zirtirtute harsatna sutkian tum loin a awm mai mai a ni, a ti ve bawk.