Kashmir-a firfiak beihnaah officer 3 leh sipai pakhat thi

Jammu and Kashmir-ah army leh police-ten firfiakte zawn chhuah beihpui an thlak mek a, Nilaini zing khan Anantnag district chhunga Kokernag ramhnuaiah inkahna thlengin officer pathum leh sipai pakhat kah hlum an ni.

Firfiak nena inkahnaah hian Army officer pahnih; Colonel Manpreet Singh, Sena Medal (Gallantry), 19 Rashtriya Rifles Unit (19 RR) Commanding officer ni bawk leh, Major Dhonchak, Sena Medal (Gallantry), 19RR Company commander te chuan an nunna an chan a. Police officer pakhat, Himanyun Muzamil Bhat, J&K Police Deputy Superintendent ni lai chu inkahnaah hian a boral bawk a ni.

Army leh J&K police-te ṭang dun chuan September 12 zan aṭang khan firfiak zawn chhuah beihpui thlak hian joint operaton an nei a, ramhnuai pik laiah firfiakte chu an tawm nia hriat a ni a, manchhuah tumin an kal a ni. Colonel Manpreet Singh leh Major Aashish Dhonchak te chuan hma hruaiin, firfiakin an lo lambunna hmunah hian kah hlum an ni ta a ni.

Firfiakte kuta thi sipaite sunna hun hi J&K Lt. Governor, Manoj Sinha chuan a hmang a, Badamibagh cantonment-a Army officer pahnihte kuangah pangpar dahin,"Firfiakte beihna avanga nunna chan tate ka thlah a ni. An chhungte ka tawrhpui tak zet a, he ram hian mi huaisente inpekna hi a theihnghilh tawh lo ang a, an lakah hian bat kan nei reng tawh zawk ang," a ti.

Firfiak zawn chhuah beihpui thlak hi chhunzawm zel a ni a, operation viltu Lt. General Rajiv Ghai leh Maj. General Balbir Singh te chuan a aia nasa zawka firfiak zawn hna an thawh tur thu leh, firfiakte chu man vek an tum thu an sawi.