US in Pathankot beitute lakah Pakistan a chet vat beisei

Pathankot-a IAF thlawhna ṭum hmun beitu firfiak hote meizang hlaptu ber laka chet thawh vat turin US chuan Pakistan a beisei tih US thuneitu sang chuan a sawi. Pakistan chuan inbeihna hnarkaitu ber India in a pek chu an chhuizui zel tih an sawi ve thung. US chuan Asia chhim lam ramte chu firfiakte dona kawnga thawkho turin a ngen reng a, Pathankot beihnaa inhnamhnawih leh a hnarkaitute chhuichhuak a, an phu tawk hremna pe ngei turin a phut a ni.

Pakistan chuan India mipui leh sorkar lakah tuarpuina thu an puang tawh a, Pathankot hmuna thil thleng chu 'firfiak chetna vanduaithlak tak' a nih thu sawiin Pakistan Foreign ministry thupuangtu chuan " Pakistan sorkarin firfiakte a beihletna leh firfiaka chetna tihtawp a tumna kawngah sorkar chu India sorkar nen an indawr tawn reng a, a meizang hlaptu nia India in a pekte pawh chhui mek a ni" a ti.

Haryana Chief Minister Manohar Lal Khattar chuan nimin khan firfiakten an thah tak Garud Commando Gursewak Singh chhungte tlawhin, a chhungkaw zinga pakhat hna pek leh martar hriatrengna siam a tiam.

Hetih lai hian Shiv Sena hotute chuan Narendra Modi leh Nawaz Sharif-te pahnih thingpui in manah sipai pasarih nunna hlan a ni a. Prime minister tan harchhuah a hun tih an sawi. BJP thawhpui Shiv Sena chuan PM Modi chu Pakistan laka a rilru puthmang zawtin, Pakistan sorkar laka rinna nghat lo turin an zilh. Shiv Sena hian an chanchinbu 'Saamna' editorial-ah Modi hi an khak deuh a, 'Pakistan lakah ngaihdan fumfe a awm lo, he sorkar hian Congress foreign policy an kalpui mai mai a ni" tiin Shiv Sena hotu Sanjay Raut chuan a sawi.

Pakistan PM nena thingpui indun vangin India sipai pasarihten nunna an chan a; hei hian a lantir chu ramri hi a him lo tak zet a, ramchhung himna a derthawng a ni a ti.

Pathankot beihnaa firfiakten an thah tak Havildar Jagdish Chand leh Garud Commando Gursewak Singh te chu nimin khan an khua thlenpui an ni.