Central team-in Tamil Nadu tuilian an zirchiang leh

Tamil Nadu chief minister J Jayalalithaa ngenna angin member pariat awmna Central Team chuan Tamil Nadu tuilian zirchiang turin Tamil Nadu an thleng. Central Team te hian tuilianin a tihchhiat leh a nghawngte chipchiar takin an luhchilh anga Union Home Ministry-ah an thilhmuh dan an thehlut anga, chumi zulzui chuan sorkar laipuiin ṭanpuina a semchhuak chauh dawn a ni.

Central team hi Home ministry-a joint secretary T V S N Prasad chuan a ho a, nimin khan chief minister Jayalalithaa an hmu. Tamil Nadu CM chuan tuilian in chhiatna a thlen vanga ṭanpuina leh insiam ṭhat nan sorkar laipui hnenah Cheng vaibelchhe 25,912.45 a lo dil tawh chu central team hi a lo hrilh nawn leh a ni.

Tamil CM chuan PM in central team ṭum hnih ngawt a tir chu lawm≠awm a tih thu sawiin, "Tamil Nadu tuilian kha khuarel chhiatna rapthlak ber pakhat" a nih thu team te hi a lo hrilh a ni.

Tamil Nadu sorkar hian thawhṭanni khan tuilian tuar chhungkaw nuai 14 te bank account-ah ṭanpuina Cheng vaibelchhe 400 a thun a. Tuilian tuartu chhinchhiah zawng zawng nuai 30.42 zinga nuai 14 te bank account chiah hi chhinchhiah fe; a ni a, a dang hian January 11 ah an dawng leh dawn a ni.