Chief Justice of India hlui SH Kapadia boral

Supreme Court-a Chief Justice hna chelh tawh Sarosh Homi Kapadia chu thawhlehni khan lung lam ṭhalo vangin a boral. Kum 68 a upa, hian a fate pahnih leh a nupui Shernaaz a kalsan.

Kapadia hi South Mumbai-a Kemps Corner ah Parsi danin an vuiliam a ni.

SH Kapadia hi kum 1947 khan Mumbai-ah a piang a, Asia rama dan zirna upa ber Government Law College aṭangin LLB a zo a ni. Kum 1974 aṭang khan Bombay High Court-ah ukil hna a thawk ṭan a; kum 1991 khan additional judge hna a chelh. Kum 1993 ah judge puitling hna a chelh a, kum 2003 khan Uttarakhand High Court-ah Chief Justice hna a chelh leh a, 2003 December thlaah Supreme Court judge hna a chelh leh a ni. Kum 2010 May 12 khan India rama Chief Justice of India 38-na ni turin lakluh a ni a, 2012 September 29 thleng Chief Justice of India hna hi a chelh a ni.

Chief Justice of India a nih lai hian General Council of the Gujarat National Law University-ah chairman a ni ṭhin a, National Law School of India University-ah visitor a ni bawk.