J&K Chief Minister Mufti Mohammad Sayeed a boral

Jammu and Kashmir chief minister Mufti Mohammad Sayeed chu nimin khan New Delhi-a AIIMS damdawi inah pneumonia, thisen tlahniam leh chuap lam ṭhalo vangin a boral. Sayeed hi kum 79 a upa niin a nupui leh a fate pali a kalsan. December 24,2015 aṭang khan AIIMS-ah hian ICU-ah enkawl a ni tawh a, nimin zing lam khan a natna tuar loin a boral ta a ni. State sorkar chuan Sayeed hi ni sarih chhung an sun ang. A vuina hun hi sher-e-Kashmir cricket stadium-ah neih a ni dawn a ni. Sorkar laipui chuan J&K Chief Minister sunna thu hi puangin, hnam puan chu a ngul chanveah zar a ni ang.

Sayeed hi ṭum hnih, kum 2002-05 leh 2015 March aṭanga a thihni thlengin J&K Chief Minister hna a chelh a; tin, muslim aṭanga Union Home minister hna chelh thei hmasa ber a ni bawk. Kum 1989-1990, VP Singh-a sorkar-ah khan Union Home Minister hna hi a chelh a ni. Home minister a nih lai hian a fanu Rubaiya chu firfiak hoin an rubo a, tlanchhuah nan firfiak panga chhuah tir an ni nghe nghe. Union home minister a nih lai khan J&K-ah hian Armed Forces Special power Act hman ṭan a ni a.

J&K-a regional party pakhat People's Democratic Party dintu niin, tunah hian a fanu Mehbooba Mufti chuan PDP president hna a chelh mek. A pa boral tak vang hian Mehbooba Mufti hian a pa thlakin J&K Chief Minister a nih ngei rin a ni.

Prime Minister Narendra Modi leh Home minister Rajnath Singh chuan Sayeed ruang hi Palam Airport aṭangin an thlahliam a, PM chuan uina thu a sawi. Sayeed thihna vang hian ram pum a ngui nghuai a, mi zawng zawngin kan ngai dawn a ni a ti. A kalsan tak a chhungte leh a mah thlawptute chu a tuarpuina thu a thawn bawk.

Mufti Mohammad Sayeed fanu Mehbooba Mufti-in a pa a thlak chuan J&K in hmeichhe chief minister an neih hmasak ber a ni ang. PDP chuan CM a ni ngei dawn tih a chian thu an sawi a, Sayeed-a ruang vui liam a nih aṭanga ni li hnuah Mehbooba hi CM atan lakluh anih tur thu an sawi.