Kum 2016-a India sum leh pai ṭhanna tur 7.8 %

World Bank chuan nilaini khan khawvel ram hrang hrang sum leh pai ṭhan dan an zirchianna an tichhuak a, India ram chu kum 2016 ah 7.8% in a ṭhang dawn niin a tarlang. Kum 2017-18 chhoah chuan 7.9% in a ṭhan beisei a ni.

Kum thum a ral leh meuh chuan khawvel ram hrang hrang zingah India ram chu sum leh pai lama ṭhang chak ber niin China -a lehpel dawn niin World Bank zirchianna chuan a tarlang.

Tunhnaia tuialhthei man a tlakhniam zel avang hian India ram sum leh pai dinhmun a ṭha sawt a, China ṭhanna erawh a kal muang hle thung.

World Bank tarlan danin kum 2015 khan China sum leh pai ṭhanna chu 6.9 % chauh a ni a. Kum 2016-ah chuan 6.7 % velin a ṭhan beisei a ni. Kum 2017/2018 ah chuan China ṭhanna hi 6.5% chauh a ni dawn niin a tarlang.

Russia leh Brazil ram erawh an sum leh pai dinhmunin ziaawm lam a pan dawn lo niin a tarlang. South Asia ram hi hmasawnna hnathawh leh sum dawnna lama hak zauh nan a ṭha deuh deuh a, an ram sum leh pai ṭhanna hi a ṭha zawng zel a ni. Heng ramte hian China nen insum dawn tawnna an nei lian loa, tuialhthei an lakluh tam ngaihtuahin, tuialhthei aṭanga thahrui siamchhuah man a tlawm hle thung.

India ṭhanna tur 7.8% beisei a nih laiin Pakistan chu 4.5 % chauh a ni.