NGT in Audis or Porsches hralhchhuak lo turin vau

National Green Tribunal chuan lirthei changkang siamtu, Volkswagen chu January 11 aṭangin an lirthei siam, boruak chhia pekchhuah thupna keng tel Audis or Porsches-te India rama hralhchhuak tawh lo turin an hrilh. Sorkar laipui chuan heng lirthei, mihring tana pawi thei boruak chhia pechhuak thei hi India ramah nuai 3.45 hralh chhuah a ni tih an tarlang.

Judicial bench chuan khawvel pumah mipuiin dan an bawhchhiat chuan India ramin a tuar nasa ber zel a, khawvel lum zel ang chite vang hian thlai thar a tlem phah fo a ni a ti.

Ministry of Heavy Industries chuan Volkswagen hi lirtheiin boruak chhia a pekchhuah theih tur duan aia tam pechhuak thei India rama an hralh avangin hrem an duh a. Lirtheiin boruak chhia a pekchhuah thupna or bumna hian emission test a tibuai ṭhin a, lirthei nihphung chu a ṭha angin a lantir thei a ni. Volkswagen hengte hi an lirthei chhungah an vuah nia hriat a ni.

NGT in a puhna hi Volkswagen chuan phain, chutiang ang bumna emaw emission test tibuai thei an vuah lo tih sawiin, Bharat Stage IV (BS-IV) emission norms an bawhchhe lo hrim hrim tih an sawi. Ministry of Heavy Industries-in hetia Tribunal-a a thlenpui vang hian Justice UD Salvi chuan ministry chuan Volkswagen te chu an lirthei hralh tawhte lakir turin an hriattir tawh niin a sawi.

Delhi khawpuia zirtirtute leh micheng ṭhenkhat chuan Tribunal ah hian ngenna thlenin, India in dan a siam ang an zawm theih loh chuan Volkswagen te hian an lirthei hi Delhi huam chhunga remkhawm emaw siam≠chhuak tawh lo turin an duh tih an hrilh a ni.