PM Modi pian cham vawi 73-na lawm Delhi airport metro line extension a hawng

Prime minister Narendra Modi chu nimin kha a pian cham vawi 73-na a ni a, India rama political party hruaitu hrang hrangte chuan lawmpuina an hlan.

Modi pian cham lawmpuitu zingah hian Congress hruaitu Rahul Gandhi leh Shashi Tharoor bakah Congress president Malikarjun Kharge pawh a tel. Anni bakah hian Bihar CM Nitish Kumar, NCP hruaitu Sharad Pawar, Delhi CM Arvind Kejriwal, Trinamool Congress hruaitu Abhishek Baherjee, Kerala CM Pinarayi Vijayan te chu a langsar zualte an ni. PM Modi pian cham pual hian Assam chuan 'Amrit Brikshya Jan Andolan' an tlangzarh a, he hmalakna kaltlang hian thing ṭiak vbc 1 phun tum niin, World record siam an tum.

BJP chuan nimin aṭangin khan PM Modi pian cham lawmna pualin, khawtlang mi zawng zawng tel theihna tur 'Sewa Pakhwara' (fortnight of service) an buatsaih. Sewa Pakhwara kaltlang hian khawtlang tana thil ṭha leh hna chi hrang hrang thawh tur niin, October 2-a Mahatma Gandhi pian cham thleng hman chhunzawm tur a ni. BJP chuan Sewa Pakhwara hnuaiah hian thisen pek, faina hnatlang leh health camp te an neih tur thu an sawi.

Modi chuan a pian cham pual hian Delhi Dwarka-a Airport metro line extend-na tur siam chu a hawng bawk a, he metro line hi km 2 zeta seia extend a ni a, Dwarka sector 21 aṭanga Yashobhoomi Dwarka sectro 25 zawmna a ni. Metro line extend a hawn zawhah hian metro-ah hian chuang nghalin, metro chuang ve dangte nen inkawmna hun an nei a, naupangte chu chocolate a pe bawk. Dwarka-ah hian Yashobhoomi an tih, International Convention and Expo Centre (IICC) chu a hawng bawk.