CWC-in Hyderabad-ah meeting nei

Congress Working Committee (CWC) chuan Hyderabad-ah meeting neiin, mipuite chu party leh ngaihdan hrang an neihte dah ṭhaa, tuna mi pakhat lal lutuka siamna sorkar chu paih thla tura ṭangrual turin an chah.

CWC meeting hi Inrinni khan neih ṭan niin, meeting kaihruaitu leh Congress President ni bawk, Malikarjun Kharge chuan hruaitu leh member zawng zawngte chu mipuite zinga awm tam tur leh an harsatnate ngaihthla tam turin a chah bawk.

CWC meeting-ah hian Sonia Gandhi chuan, BJP rorelna bei let a, kum 2024 Lok Sabha inthlana hnehna an chan duh chuan Congress tiama party 28 intel khawmna, INDIA kaltlanga an inzawm tlat a ṭul thu a sawi. Gandhi chuan mahni inthunun a, pawlin a thil tumte a hlawhchham loh nan media lama thil puangzar zung zung lo turin a chah a ni.

Lok Sabha inthlan mai ni loin, nakkuma inthlanna nei tur, Madhya Pradesh, Rajasthan leh Chhattisgarh atan pawh inbuatsaihna kalpui ṭan a nih thu CWC meeting-ah hian an sawi.

Parliament special session-a pass turin Women's reservation Bill put luh ngei an tum thu an sawi bawk. Congress thupuangtu, Jairam Ramesh chuan,"Prime minister Manmohan Singh khan Parliament leh state legislature-a hmeichhe tana reservation siamna tur bill hi March 2010 khan a lo pu lut tawh a, Rajya Sabha-ah pass ni mah se, Lok Sabha-ah erawh rel a ni ta lo. Kan ram danah chuan Rajya Sabha-a bill pass reng reng hi a lapse ve lo a, tunah hian a la nung reng a ni," a ti.

Meeting-ah hian resolution pass bawkin, state assembly inthlan nei mai tur state panga; Chhattisgarh, Madhya Pradesh, Mizoram, Rajasthan leh Telangana mipuite chuan duh an thlan thuai tur thu leh Congress chu inthlan hmachhawn tura an inpeih thu an sawi.

Congress Working Committee hi Congress party chhunga rorelna sang ber a ni a, nikuma Mallikarjun Kharge President a nih hnuah CWC hi siam ṭhat niin tun hi Kharge hnuaia an meeting hmasa ber a ni. CWC-ah hian member 39 awmin, permanent invitee 32 leh special invitee 13 an awm bawk a, kumina CWC siam ṭhatah hian member thar, Shashi Tharoor, Sachin Pilot leh Gaurav Gogoi te an tel a ni.