J&K-ah firfiak zawn beihpuithlak chhunzawm zel

Jammu and Kashmir Anantnang district-a firfiakte zawn beihpuithlakna chu chhunzawm zelin, nimin thleng khan an la inkap chhunzawm. Beihpuithlak viltu, Lt. General Upendra Dwivedi chuan firfiakte chu ramhnuaia inbei tura training nei leh dinhmun ṭha zawka an din avangin an la man thei lo niin a sawi.

Firfiakte nen hian kar hmasa Nilaini khan innangchingin an inkap a, he inkahnaah hian sipai officer pahnih leh police officer pakhatin nunna an chan a ni. Heng firfiakte hi pathum nia hriat a ni a, hmanraw ṭha ber ber nen inchhawpin an inkhuarna pawh uluk taka an thlan avang leh, ramhnuai leh tlang pang chhengchhe takte an hman thiam avangin luh chhuah mai theih an ni lo. Firfiakte nen an inkah aṭang hian ni 5 zet a ral tawh a, ṭum thum inkahna thleng tawhin sipai pahnihin nunna an chan tawh tih sipai thupuangtu chuan a sawi a, firfiakte hi Kokernag-a Gadul ramhnuai tlanga puk pakhatah an tawm niin hriat a ni. Northern Army Commander chuan firfiakte awmna zawng tur hian drone-te hman a nih thu sawiin, drone hian firfiakte chetla lai pawh a lak fuh thu a sawi bawk.