Pathankot beituten Pakistan number bia

Firfiakten Punjab-a Pathankot-a Air Force Base an beih chungchang chhuina kal zelah, intelligence-te chuan pawikhawihna ruahmantu berah Pakistan-a inkhuar, Jaish-e-Mohammad pawl hotu Maulana Masood Azhar leh midang pathumte an puh bakah, airbase beitute hian Pakistan phone number pahnih an bia tih an sawi.

Times of India-in a tarlan danin, firfiak paruk zinga pahnih hian phone number,92-3017775253 leh +92 300097212 an bia a, heng number-te hi Pakistan number a nih thu a sawi. Number hmasa zawk hi firfiak zinga pakhat nu number a ni a, a hnuhnung zawk hi pawi≠khawih≠tute zinga pakhat number a ni. Security official-te chuan Pathankot beitu zinga pakhat hian a mi biak chu 'Ustaad' tia a koh thu TOI chuan a tarlang a, an chet tlat dante a hrilh a ni.

Firfiakte hian December 31 khan Pakistan number-ah hian an taxi hman driver Ikaagar Singh-a phone hmangin an bia a, a hnuah driver hi an that zui nghal a ni. An phone biak pakhatah hian Ustaad tia an koh hian airbase an thlen har avanga firfiakte a hau thawm pawh hriat tur a awm. Firfiakte hian Ikaagar phone hi mi biak chhuahna atan ṭum khat chauh hmang mah se, he phone aṭang vek hian call vawi li an dang thung.
JeM hotu Azhar bakah a unaupa, Abdul Rauf Asghar leh mi dang pahnihte chu airbase beihna tur ruahmantu ber niin intelligence agency-te chuan an sawi.

January 2 zingah firfiakte Pathankot airbase an beihnaah khan security force mi pasarih an thi a, airbase beitu firfiak parukte hi Pakistan aṭanga rawn kal vek niin, security force-ten an vai hian an kaphlum an ni.

Pathankot airbase beih a nih hnu hian Pakistan firfiakten Gurdaspur dis≠trict-a sipai hmun beih an tum leh nia rin≠hlelhna a awm avangin venhimna uluk taka kalpui a ni. Gurdaspur district-a Army Cantonment bulah mi pahnih biru an hmuhin, tualchhung mite chuan an rinhlelh avangin sipaite an hriattir nghal a, SWAT team tirh luh nghal an ni. Sipaite hmun leh a chhehvel te hi thlawhtheihna hmanga enfiah nghal vek a ni bawk.
Punjab Police Deputy Inspector General (Border Range) Kunwar Vijay Pratap chuan drone hmangin Ningani khan firfiak nia rinhlelhte hi zawn nghal an ni tih a sawi. Firfiakten beih an tum leh nia an rinhlelh, sipai hmunpui hi Pathankot IAF staion aṭangin a hla lo a, India leh Pakistan ramri aṭanga km 20 vel chauha hlaa awm a ni. Nikum July thla khan Pakistan firfiakte chuan Gurdaspur-a police station chu an lo bei tawh a ni.