Governor rule hnuaiah J&K dah

Jammu and Kashmir chu Chief Minister Mufti Mohammad Sayeed a thih hnuah amah thlaktu tur lakluh a la nih loh avangin kar kalta Inrinni zan aṭang khan Governor rule hnuaiah dah lailawk a ni.

Mufti Mohammed Sayeed hi a fanu, Mehbooba-in a thlak dawn a, mahse ani hian a pa sun hun chhunga thil dang ngaihtuah a la duh rih loh avangin Governor rule hi puan a ni ta rih a ni.

Home Ministry thupuangtu chuan Inrinni zan khan Governor rule hnuaiah dah a nih thu a puang a, Jammu and Kashmir Constitution Section 92 hnuaiah Governor NN Vohra chu state enkawl tura thuneihna pek a ni.

Jammu-a Raj Bhawan thupuangtu chuan President of India remtihnain Governor Rule puan a nih thu a sawi a, "January 7-a Chief Minister Mufti Mohammad Sayeed a boral hnuin, sorkar thar siam tur chungchangah PDP leh BJP te thu nghah mek a ni. Mahse CM thar lakluh turah la nghah deuh a ngaih dawn avangin, January 8 aṭangin Govenor Rule hi puan a ni ta a ni" a ti.

CM thar lakluh a nih hma chuan hei hi hman chhunzawm a ni ang.

Union Minister Nitin Gadkari leh Congress president Sonia Gandhi-te chuan Mufti Muhammad Sayeed-a ral turin nimin khan Srinagar an tlawh. BJP chuan Gadkari hian Sayeed-a fanu, Mehbooba Mufti pawh a chenna-inah a hmu nghal dawn niin a tarlang.