Congress-in hmeichhe candidate tam zawk dah tum

Congress party chuan Bihar Assembly neihah an party aṭanga hmeichhe candidate-te an chet ṭhat avangin, assembly inthlan neih leh tur, Assam, Punjab leh Uttar Pradesh-ah pawh hmeichhe candidate tam zawk dah a tum.

All India Mahila Congress president, Shobha Oza chuan party president Sonia Gandhi leh vice-president Rahul Gandhi-te chu hmeichhiate thuam chakna thlawp rengtu an ni a, ramchhung state hrang hranga assembly inthlanah pawh hmeichhe candidate tam zawk dah an duh a ni, a ti.

Party chhunga mipate dahsanna a la awm avangin hei hi a la tihlawhtling thei lo niin a sawi. Mahse tunhnaia Bihar inthlanah hmeichhe candidate te chet ṭhat avangin party thil thlir dan pawh a thlak danglam tawh a ni, a ti.

Oza chuan, "Local body level
aṭangin hmeichhe ṭha, candidate ni tlak turte kan zawng a ni. Bihar aṭang khan hmeichhiate chuan politics dik tak khelin, rorelna kawngah mipuite nena inpawhna ṭha tak an nei thei tih kan zirchhuak a ni," tiin a sawi.

Bihar Assembly inthlanah khan Congress hian seat 43 a chan aṭangin hmeichhe candidate panga a dah a, an zinga pali chu thlan tlin an ni.

Punjab civic poll-ah pawh Congress party hi a che ṭha a, Oza chuan Bihar-a an chet ṭhat hnuin, Punjal civic poll-ah hian hmeichhe candidate an siam chu 65%-in an tipung niin a sawi.