Delhi boruak a thianghlim sawt

Delhi sorkarin khawpui chhung boruak bawlhhlawh chak lutuk tihziaawmna atana January 1 aṭanga motor number kawpkim leh kawpkim lo a intlanchhawk tir chuan nghawng ṭha tak a nei a, Delhi boruak pawh a thianghlim phah sawt nia sawi a ni.

Hetihlai hian motor inthlanchhawk avang hian khawpuia chhunga chengte chuan veivahna lamah harsatna an tawh phah nasa hle thung.

Ni sawm chhung motor inthlanchhawk a nih hnuah Delhi khawpui pollution level chu a tlahniam nasa hle. He scheme hi ni 15 chhung hman phawt tura tih ni mah se, mipuite'n veivahna lama harsatna an tawh avangin Delhi High Court chuan vawiin hian titawp tawh turin a ti thung.

Hetihlai hian Delhi sorkar chuan khawpui chhung boruak bawlhhlawh tizia≠awm tur chuan ni 15 chauh a tawk lo tih High Court hi a hrilh.

Delhi Transport Minister Goopal Rai chuan, "Ruahmanna kan siam hi January 15 thleng chu hman chhunzawm a ni ang. Hemi hnuah pawh hian thil awmdan te kan zirchiang leh phawt dawn a ni" a ti.

State sorkar aiawhtu, lawyer Harish Salve chuan, "Thil ṭha zawk siam turin hei chauh hi kan hmalak tumna a ni lo a, mahse hei hi kan bul ṭanna a ni. Thla hnih khat chhung lekin boruak bawlhhlawh hi a kiang duak dawn lo a, hun eng emaw chen a ngai dawn a ni. He project hi mipuite ṭhatna tur chauh ngaihtuaha siam a ni" tiin a sawi.

Delhi sorkar hian mi hausa zawkte pawhin mahni motor kengchhuak kher lo a, public transport an hman tam zawk theihna turin bus fare man sang zawkin "Premium Bus Service' siam a tum.

Delhi Transport Corporation (DTC) chuan air-conditioned premium bus-te hi fare sang zawkin tlantir a tum a, he bus service-ah hian first-class facility pek niin, mi hausa leh awmthei zawkte hipna atan tih a ni.

Transport Minister Gai chuan, "Premium Bus Service-ah hian bus service pangngai ai chuan a fare chu a sang hle zawk dawn a, mahse mahni car kenga office kal ṭhinten an hman duh tura siam tuma ni. Heng bus-te hi mi hausa leh awmthei zawkte chenna leh hnathawhna bial chhungah, kawng bik neiah chauh tlantir an ni ang. Bus seat-te hi online hmangin book theih a ni bawk ang" a ti.

Premium Bus Service hi hman tan thuai a nih theihna turin sorkar chuan hma a la mek tih a sawi bawk.