CBI-in Pearls Group hotu Bhangoo a man

Central Bureau of Investigation (CBI) chuan investor tam takte sum dahkham, cheng vaibelchhe 45,000 vel tichingpena puhna kaihnawihah Pearls Group CMD Nirmal Singh Bhangoo leh mi dang pathumte chu Inrinni khan an man a, Delhi court chuan ni 10 an kawl a phalsak.

Metropolitan Magistrate Harvinder Singh chuan Bhangoo leh Pearls Group company top executive pathum-te chu CBI-ten an dil angin thu an zawhfiah theihna atan leh, sum chingpente chhuichhuah a nih theihna atan January 19 an kawl a remtihsak a ni.

CBI-in a mante hi Bhangoo bakah Sukhdev Singh, MD and Promoter-Director of Pearls Agrotech Corporation Ltd (PACL), Gurmeet Singh, Executive Director (Finance) leh Subrata Bhattacharya, PGF/PACL-a ED te an ni a, IPC hnuaiah thubuai siamsak an ni.

Thubuai ngaihtuahnaah hian CBI chuan an mi mante hian investor-te chu dawta bumin sum tam tak an dahkhamtir niin a sawi.